Ormsblogg

Þá er beinni Gettu betur þátttöku minni víst lokið. Það er vissulega sárt að tapa svona naumt og augljóst að þegar liðin eru svona jöfn getur ein spurning til eða frá skipt öllu máli. Hinsvegar hjálpar ekkert að velta sér upp úr þessu og nú vona ég bara að MK takist að sigra MR liðið, en þar er við ramman reip að draga.

Eftir á að hyggja sé ég engar veilur á herkænsku okkar en spurningarnar áttu ekki alveg nógu vel við okkur. Þó að Davíð Þór sé með skemmtilegri dómurum í þessari keppni þá er kynslóðabilið kannski svolítið greinilegt. Margar vísbendingaspurningarnar voru full léttar þannig að mjög oft var barátta um bjölluna í fyrstu vísbendingu á meðan aðrar komu aldrei. Albert Scweitzer og leikritið Hárlausa Söngkonan eru atriði sem hver einasta manneskja yfir fertugu virðist vita á meðan við unglingarnir stöndum á gati. Þetta er reyndar mjög athyglisvert fyrirbæri þar sem Albert Schweitzer var eftir frekari rannsóknir mínar (byggðar á munnlegum heimildum) nefndur við svipuð tilefni og Móðir Theresa og Dalai Lama og í alla staði mjög athyglisverður. Þessi vitneskja virðist þó af einhverjum ástæðum ekki hafa borist áfram til yngri kynslóða. Nú vona ég bara að skrif mín séu ekki mörkuð of miklum biturleika því að við þessar aðstæður skiptir mestu að geta tapað með reisn. Ég vil þakka öllum vinum aðstandendum og skólafélögum stuðninginn og þá sérstaklega þeim dygga hópi sem hefur komið á næstum hverja keppni (þið vitið hver þið eruð).
Á hversdagslegri nótum þá er fyrstu nánu kynnum mínum af áfengi lokið og þar með tel ég mig hafa uppfyllt loforð mitt til Hildar og Snorra.

Tónlist: Radiohead- Amnesiac. Frábær plata en ég mæli ekki með henni fyrir andlega óstöðuga.

Verzlingar stóðu sig vel síðasta föstudag. Það er hinsvegar leiðinlegt að hitt liðið skipað stelpum hafi dottið út, en það stóð sig einnig mjög vel miðað við að það er bara skipað nýliðum. Spurningarnar hans Davíð eru líka skemmtilegar (óskaplega er þessi færsla að verða pirrandi jákvæð) og þessi keppni var næstum því eins og sniðin fyrir okkur, án þess að ég gefi meira upp. Hinsvegar er greinilegt að við þurfum að passa okkur því sumar spurninganna eru augljósari en maður þyrði að halda á meðan aðrar eru langsóttari og því væri auðvelt að brenna sig á bjöllunni. Annað áhyggjuefni tengt þessu eru skemmtiatriðin. Ég hef ekkert heyrt frá Sjónvarpinu um tilhögun þeirra en samt eru stjórnin og liðið farið að velta þessu fyrir sér. Ætli það væri ekki MH-legast að senda einhverja hljómsveit en það gæti orðið erfitt að velja úr flórunni. Svo er náttúrulega viðbúið að flestir MH-ingar verði á Morfís. Ef allt bregst sendum við bara trúbadorinn Snorra Snobb (núna vantar bara viðurnefni fyrir Hildi) upp á svið.

19 ára afmælið er um helgina en ólíkt síðustu þremur (jafnvel fleirum ef maður telur með sakhæfi) afmælum er ekkert merkilegt við þau tímamót frá lagalegu sjónarmiði, ég skora á ykkur að finna eitthvað. Það þýðir ekki að afmælið verði leiðinlegt. Þóra systir er búin að bjóða mér á Leg á föstudaginn og svo verður eitthvað boð á laugardaginn. Miðað við tímamótin framundan er líka best að halda þessu í smærri kantinum. Steinar fermist 1. apríl og fékk kjólföt í tilefni þess. Það er greinilegt að fatasmekkurinn þroskast við þessi tímamót. Í maí verður svo hið stórskemmtilega tvöfalda fimmtugsafmæli/útskrift sem allir bíða spenntir eftir.